Javan wedi’i enwi yng ngharfan yr Alban ar gyfer gemau’r haf

Rob Lloyd Newyddion

Mae Javan wedi sôn am ei syndod ar ôl cael ei enwi yng ngharfan yr Alban ar gyfer gemau’r haf.

Mae’r prop 26 oed wedi cael ei gynnwys yn y garfan 34 dyn sydd wedi’i ddewis gan brif hyfforddwr Mike Blair ar ddydd Mawrth.

Mae Javan yn gymwys i’r Alban trwy ei dad a gafodd ei eni yng Nghaeredin. Cafodd tymor gyda Glasgow Warriors yn 2016, ond fe ddatblygodd trwy lwybr datblygu’r Scarlets, gan chwarae i’r Academi, Cymru d18 a Chwins Caerfyrddin yn yr Uwch Gynghrair Gymraeg cyn iddo ennill ei le yng ngharfan y Scarlets.

Nawr yn ei ail gyfnod ym Mharc y Scarlets, mae Javan wedi chwarae 18 gêm y tymor yma a 38 yn gyfan ers iddo wneud ei ymddangosiad cyntaf yn 2014 ac yn ddiweddar fe ymrwymodd i’r clwb yn hirdymor wrth arwyddo cytundeb newydd.

“Dwi wrth fy modd, ro’n i ddim yn ei ddisgwyl o gwbl felly dwi’n hapus iawn gyda’r galwad, mae’n foment balch iawn i’r teulu,” dywedodd.

“Roedd fy nhad-cu o Felize ac roedd fy nhad wedi ei eni a’i fagu yng Nghaeredin. Cefais flwyddyn gyda Glasgow Warriors yn 2016, ond erioed wedi meddwl am gael cyfle i chwarae i’r Alban. Mae’n anrhydedd enfawr i mi ac yn gyrhaeddiad i mi gan fod fy nhad yn Albanwr felly mae’n agos iawn at fy nghalon.

“Ar ôl ailgychwyn o’r cyfnod clo, roeddwn yn edrych ymlaen at weithio’n galed a cheisio cael cyfleoedd i chwarae yma. Gweithiais gyda Ben Franks a Glax (Glenn Delaney), ac fe wnaethon nhw fy helpu a fy ngwthio. Roedd rhaid cymryd camau bach ymlaen i allu cael y wobr.

“Dwi wedi bod mewn cysylltiad gyda rhywun o dîm rheoli’r Alban ac maen nhw’n disgwyl i fy ngwthio i wella fel chwaraewr. Rwy’n edrych ymlaen yn fawr at ymuno â’r garfan.”

Bydd tîm yr Alban A yn chwarae yn erbyn Lloegr A yn stadiwm Mattioli Woods Welford Road ar ddydd Sadwrn, Mehefin 27 cyn i’r tîm chwarae yn erbyn Rwmania ar Orffennaf 19 a Georgia ar Orffennaf 17.